Monday, July 26, 2021

မျိုးဆက်သစ် ငါ့ရှင်ငယ်များသို့ (၃)

အခါများစွာ၊ နေရာနယ်ပယ် များစွာမှာ ငါ့ရှင်လေးတို့ရဲ့ အမြင်နဲ့ ကမ္ဘာ့အမြင် မတူညီရာကနေ ပြဿနာတက်တတ်တယ် ဆိုတာကို သတိထားမိကြစေဖို့ ပြောချင်ပါတယ်။ ဖေ့စ်ဘွတ်မှာ ကိုယ်တွေ့ ​ပြဿနာ ကြုံရပြီးတဲ့နောက် မန်း နပသ ပါဠိဌာနက ဆရာတော်ကြီးတစ်ပါး အလားတူ ပြဿနာ ထပ် ကြုံရတာလေးနဲ့ ဆက်စပ်လို့ စဥ်းစားမိတာလေး ပြောချင်ပါတယ်။ 
 
ဆရာတော်ကြီးရဲ့ ဖေ့စ်ဘွတ်အကောင့် အပိတ်ခံခဲ့ရတယ် တဲ့။ အကောင့် မပိတ်ခင် သူ နောက်ဆုံးတင်ခဲ့တဲ့ စတေးတပ်စ် နဲ့ အကောင့်ပြန်ပွင့်လို့ ပြန်တင်လိုက်တဲ့ စတေးတပ်စ်တွေရဲ့ ရက်စွဲအရ ဂျူလိုင် (၁၅)ကနေ (၂၅)အထိ (၁၀)ရက် ပိတ်ခံရတယ်လို့ ခန့်မှန်းရပါတယ်။ ပြစ်မှုက မဖွယ်မရာ ဓာတ်ပုံ တင်လိုက်တဲ့ အမှု တဲ့။
 
ဆရာတော်ကြီးက ကြီးကောင်းကြီးမှ ဘာ မဖွယ်မရာပုံတွေများ တင်လိုက်မိလို့လဲ။ ပုံတွေ ဝါသနာပါလို့ ကိုယ်ကြည့်ချင်ရင် ကိုယ့်ဖုန်းထဲကိုယ် သိမ်းထားပါ့လား။ ကိုယ်ကြည့်ချင်မှ ညည ထကြည့်။ မနက် စောစော ထကြည့်။ နေ့ဆွမ်း မဘုဉ်းခင် ကြည့်။ နေဆွမ်းစားပြီး ခဏကြည့်။ ခဏကျိန်းချင် ကျိန်းလိုက်အုံး။ တစ်ရေးနိုးမှ မျက်နှာ မသစ်ခင် ခဏကြည့်။ မျက်နှာသစ်ပြီး အဝကြည့်။ ညနေ ဘုရားဝတ်မတက်ခင် ကြည့်။ ဘုရားဝတ်တက် မေတ္တာပို့ပြီး ကြည့်။ တရား မထိုင်ခင် နဲ့ တရားထိုင်ပြီး ကြည့်။ ညအိပ်ယာဝင် မကျိန်းခင် တစ်ခါကြည့်။ အိပ်မပျော်ရင် ထကြည့်။ စိတ်တိုင်းကျ ကြည့်လို့ရတယ် မဟုတ်လား။ အဲ့ဒါကို ကိုယ်တစ်ပါးတည်း ကြည့်ရတာ အားမရလို့ သူများကြည့်ရအောင် လိုင်းပေါ်ထိ တင်လိုက်တာတဲ့လား။
 
အဲ့လိုကြီးလည်း မဟုတ်ပြန်ဘူး။ သူတင်လိုက်တာက မဖွယ်ရာပုံ ဆိုပေမယ့် အောက်ပိုင်း ကိုယ်တုံးလုံးနဲ့ နှစ်လုံးပြူးနေတဲ့ ကလေးပုံပါ။ အဲ့ဒီ ကလေးပုံကို တော်တော်များများ မြင်ဖူးကြမယ် ထင်ပါတယ်။ ရာသီဥတု ပူလွန်းလို့ ဒီလိုတောင် ချွတ်ထားရတယ်ဆိုတဲ့ သဘောမျိုးနဲ့ တော်တော်များများလည်း တင်ဖူးကြမှာပါ။
 
အဲ့ဒီပုံကို ကိုယ်တိုင်းလည်း တင်ဖူးပါတယ်။ အကောင့်လည်း အပိတ်ခံရဖူးတယ်။ ပါဠိဆရာတော်ကြီး ပုံတင်လိုက်တော့ အကောင့်ပိတ်ခံရတတ်တယ်၊ ပုံကို ဖြုတ်လိုက်ပါ့လားလို့ သတိပေးခဲ့သေးတယ်။ သူက မရဘူး။ မယုံတာလည်း ဖြစ်ချင်ဖြစ်မယ်။ ဒီအကောင့်ပိတ်ရင် တစ်ခြားအကောင့်နဲ့ သုံးမယ်လို့ တွက်ထားတာလည်း ဖြစ်နိုင်တယ်။ ဘာပဲဖြစ်ဖြစ် သူ့အကောင့် အပိတ်ခံရတယ်။ စောစောက ပြောခဲ့သလို ဆယ်ရက်။ ကိုယ်တိုင် အပိတ်ခံရတုန်းကတော့ တစ်ရက် နှစ်ရက်ပဲ ကြာတယ်။ သူနဲ့စာရင် အကောင့် မြန်မြန် ပြန်ပွင့်တာ အလကား ရခဲ့တဲ့ အထူး အခွင့်အရေးတော့ မဟုတ်ဘူး။ အကောင့် အပိတ်ခံရတာနဲ့ ဂျီမေးလ်ကနေ ဖေ့စ်ဘွတ်ဆီ စာရေးတယ်။ ဒီပုံဟာ သူများဆီက ယူလာတာ ဖြစ်တဲ့အကြောင်း ပြောတယ်။ မရသေးဘူး။ ဓာတ်ပုံထဲက ကလေးကို ဘယ်လိုမှ သဘောမထားကြောင်း၊ ရာသီဥတု ပူပုံကို အသောနဲ့ ဖွဲဲ့ဆိုတာသာ ဖြစ်တဲ့အကြောင်း၊ ကိုယ်တုံးလုံး ဆိုပေမယ့် ကလေးမို့ ချစ်စရာသာ ဖြစ်တဲ့အကြောင်း၊ မြန်မာမှာဆိုရင် ကလေးကို ချစ်တဲ့စိတ်နဲ့ ကလေးရဲ့ အဝှာကို ငုံကိုက်ပြီး ကလေးမြှူ တဲ့သူတွေတောင် ရှိတဲ့အကြောင်း ဘာညာသာရကာ ထပ်ပြောပြတော့မှ ဖွင့်ပေးလိုက်တာ။ ပြဿနာထဲ ဝင်မိရင်တောင် ရုန်းထွက်အားရှိရင် ပြဿနာက မြန်မြန်လွတ်နိုင်တယ် ဆိုတာကို သတိပြုမိစေချင်ပါတယ်။
 
ဒီကနေ ငါ့ရှင်လေးတို့ သင်ခန်းစာ ယူကြစေချင်ပါတယ်။ အခုပြောခဲ့တဲ့ ပြဿနာရဲ့ အရင်းအမြစ်က အမြင်မတူခြင်းပဲ။ နှလုံးပြူးထွက်နေတဲ့ အောက်ပိုင်းဗလာနဲ့ ကလေးပုံကို ကိုယ်က ချစ်စရာလို့ မြင်တယ်၊ သူတို့က ကလေးအပေါ် မတရားလုပ်တာလို့ သတ်မှတ်တယ်။ ကလေး အခွင့်အရေးကို ကြည့်တယ်။ ကလေးအပေါ် လိင်ပိုင်းဆိုင်ရာ အမြတ်ထုတ်တဲ့သဘော သက်ရောက်တယ်လို့ သတ်မှတ်တယ်။ ကိုယ့်အတွက် ချစ်စရာ ပျော်စရာ ဖြစ်ပေမယ့် ကမ္ဘာ့အမြင်မှာကျတော့ မတရားမှု ဖြစ်နေတယ်။ အဲ့ဒါပါပဲ။
 
ဆက်တွေးရင် ဒါမျိုးတင် ဘယ်ကမလဲ။ ငါရှင်တို့ ပတ်သက်ရတဲ့ ဘာသာရေး၊ လူမျိုးရေးတွေထိ သွားလို့ရတယ်။ ငါ့ရှင်တို့က ကိုယ့်ဘာသာကို ကိုယ်ချစ်တယ်။ ကိုယ့်လူမျိုး ကိုယ်ချစ်တယ်။ ယေဘုယျစကား ပြောရရင် ကိုယ့်အမျိုး ကိုယ့်ဘာသာ ကိုယ့်သာသနာကို ကိုယ်ချစ်ရမှာပေါ့။ ကိုယ်မချစ်လို့ ဘယ်သူက လာချစ်မှာလဲ။ ဒါပေမယ့် ချစ်လွန်းတော့၊ ကိုယ်ချစ်ပုံနဲ့ ကမ္ဘာက လက်ခံပုံ မတူတော့ . .. .. . အချစ်ရဲ့ နောက်ဆက်တွဲ ပြဿနာတွေ. .. .. . ကြားကြမြင်ကြ သိကြတယ် မဟုတ်လား။ 
 
ကိစ္စတိုင်းမှာ ကမ္ဘာကို ထည့်မတွက်လို့ မရပါဘူး။ ကမ္ဘာ့အခင်းအကျင်းကို အမှီအကိုး မပြုရင် ကမ္ဘာနဲ့ ပြဿနာတက်ရပါလိမ့်မယ်။ ပြဿနာ တက်ပြီးဆိုရင်. .. ... စောစောက ပြောခဲ့တဲ့ ဖေ့စ်ဘွတ် ပြဿနာမှာက ဖေ့စ်ဘွတ် မသုံးဘဲ နားထားလိုက်လို့ ရ​သေးတယ်။ အကောင့်အသစ် ဖွင့်သုံးလို့လည်း ရတယ်။ အကောင့် ပြန်ဆယ်လို့ ရနိုင်တယ်။ လက်တွေ့ဘဝမှာ၊ အထူးသဖြင့် သာသနာရေးမှာ ပြဿနာ ဖြစ်လာရင် ပြောသလောက် မလွယ်တော့ဘူး။ ဖေ့စ်ဘွတ် အသုံးနားသလို သသနာတော်ကြီး နားနေလို့မှ မရတာ။ ဖေ့စ်ဘွတ် အကောင့်သစ် ဖွင့်သလို သာသနာတော် အသစ် ထူထောင်ဖို့လည်း မဖြစ်နိုင်ဘူး မဟုတ်လား။ သာသနာတော် အဖတ် ပြန်ဆယ်ရရင် ဖေ့စ်ဘွတ်အကောင့် ပြန်ဆယ်တာလောက်နဲ့ မရတော့ဘူး။
 
သာသနာအပေါ် မှီတည်နေရတဲ့၊ သာသနာဝန် ထမ်းနေရတဲ့ ငါ့ရှင်လေးတို့ ပညာ သတိ ကြီးကြဖို့ သတိပေးပါရစေ။ နေရာတကာမှာ အရမ်းမလုပ်ကြဖို့ သတိပေးပါရစေ။ ငယ်ငယ်က နားထောင်ခဲ့ရတဲ့ ပန်တျာ တင်တင်မြင့်ရဲ့ မုန်တိုင်းအငြိမ့် ကက်ဆက်တိပ်ခွေထဲက လူရွင်တော်တွေက မင်းသမီးကို သတိပေးသလို ပေးရတော့မှာပဲ။ လူရွှင်တော်တွေ ပြောတာက အရမ်းမလှုပ်နဲ့၊ အရမ်းလှုပ်ရင် ပုဂံက ဘုရားတွေ ပြိုကုန်လိမ့်မယ် တဲ့။ ပန်တျာကြည်လင်နဲ့ လင်မယားကွဲပြီး အငြိမ့်ကတော့ အဲ့ဒီခေတ်က ဇာတ်သဘင် အရွေ့အတိုင်း ရုံးသွင်းရတဲ့ထိ အောင်မြင်ခဲ့တဲ့ မင်းသမီး ပန်တျာ တင်တင်မြင့် ဘယ်လောက် လှုပ်သလဲ ဆိုတာကတော့ ကြည့်ဖူးသူတွေပဲ သိပါလိမ့်မယ်။
 
ဆိုလိုတာက ငါ့ရှင်လေးတို့ အနေနဲ့ ကိုယ့်အမျိုး ကိုယ့်ဘာသာ ကိုယ့်သာသနာအတွက် လှုပ်ရေးကြုံလို့ လှုပ်တော့မယ်ဆိုရင် အရမ်းမလှုပ်ကြဖို့ နဲ့ ကမ္ဘာ့စံနဲ့ ဟလွန်းသွားရင် ပြဿနား ကြီးသွားတတ်တယ် ဆိုတာကို သတိပေးချင်တာပါ။ သတိပေးစကားကို အရေးစိုက်ခြင်း မစိုက်ခြင်းကတော့ ငါ့ရှင်တို့ရဲ့ ကိုယ်ပိုင် ဆုံးဖြတ်ချက်ပါပဲ။
 
🙂
ရှင်အာစာရ

မျိုးဆက်သစ် ငါ့ရှင်ငယ်များသို့ (၂)

 

July 25, 2021

-----
အပိတ်ကြီး ပိတ်နေပြီး အညံ့ကြီး ညံ့ရာကနေ အရိုင်းအစိုင်းကြီး ဖြစ်မသွားဖို့ အရင်တစ်ခါ သတိပေးခဲ့ပါတယ်။ အသုံးချခံရတာမျိုး၊ ခုတုံးလုပ်ခံရတာမျိုး မဖြစ်ဖို့ သတိပေးပါအုံးမယ်။ ငါရှင်လေးတို့ အသုံးချခံရတယ်ဆိုရင် သာသနာတော်ပါ အသုံးချခံရတာပါပဲ။ ငါ့ရှင်လေးတို့က သာသနာတော်အပေါ်မှာ မှီတည်နေတာကိုး။ ဒါ့ကြောင့် ပြောရတာပါ။ 
 
သာသနာ​တော် အသုံးချခံရတယ်၊ ဘာသာရေး အသုံးချခံရတယ်ဆိုတာ ခုမှ ဖြစ်လာတာတော့ မဟုတ်ပါဘူး။ ​ပြစရာ ဖြစ်ရပ်တွေ များစွာထဲက တစ်စ ယူကြည့်ရအောင်။ ဟိုတုန်းကပါ။ နိုင်ငံရေး လောကသားတွေ အချင်းချင်း ပြိုင်ကြရာမှာ ဘာသာရေးဘက်က လှေ့ပန်းပြီး ပြည်သူတွေရဲ့ ထောက်ခံမှုကို ယူကြတယ်။ တစ်ဘက်က တစ်ဘက်ကို ကွန်မြူနစ်လို့ နာမည်ပေးတယ်၊ ကွန်မြူနစ်တွေဟာ ဘာသာမဲ့တွေလို့ လက်ကိုင်ပြု ပြောဆို​ပြီး စည်းရုံးကြတယ်။ အစည်းရုံးခံ ပြည်သူအများစုက ဗုဒ္ဓဘာသာတွေကိုး။ ဗုဒ္ဓဘာသာ ပြည်သူတွေ အနေနဲ့ ဘာသာမဲ့တွေကို မထောက်ခံကြနဲ့၊ ဗုဒ္ဓဘာသာ အားပေးတဲ့ ငါတို့ကို ထောက်ခံကြလို့ စည်းရုံးတာပေါ့။ သူတို့ ဘယ်လောက် အောင်မြင်ခဲ့တယ်၊ မအောင်မြင်ခဲ့ဘူး ဆိုတာကတော့ အတိတ်သမိုင်း ပြန်ကြည့်ရမှာပါ။ သေချာတာကတော့ နိုငံရေးအတွက် ဘာသာရေးကို အသုံးချခဲ့တယ် ဆိုတာပါပဲ။ အဲ့ဒီခေတ်က ဘာသာမဲ့ အခေါ်ခံရတဲ့ ကွန်မြူနစ်တွေ ဗုဒ္ဓဘာသာအပေါ် ဘယ်လို သဘောထားခဲ့တယ်၊ ဘယ်လို ပြုမူခဲ့တယ် ဆိုတာလည်း အတိတ်ကို ပြန်ကြည့်ရမှာပါပဲ။ ဘာသာရေး ဗန်းပြပြီး စည်းရုံးရာကနေ ပြည်သူတွေရဲ့ ထောက်ခံမှု၊ ထောက်ခံမဲ ရမရ မပြောတတ်ပေမယ့် သူတို့ ဝါဒဖြန်တဲ့ "ကွန်မြူနစ် ဘာသာမဲ့" ဆိုတဲ့ လှေ့လုံးကြီး တော်တော်ခရီးပေါက်ခဲ့တယ် ဆိုတာကတော့ သေချာပါတယ်။
 
ဆရာတော်ကြီးတွေကိုတောင် ကွန်မြူနစ်ကြီးလို့ နာမည်တပ်နိုင်တဲ့အထိ ခရီးပေါက်ခဲ့ပါတယ်။ ဗုဒ္ဓဘာသာနဲ့ ပတ်သက်လို့ မကုန်သင့်တာ မကုန်အောင် ချွေတာသုံးစွဲဖို့၊ ဘာသာရေး အသုံးစရိတ်တွေ မပြုန်းတီးဖို့ ပြောမိရင်တောင် ဘာသာမဲ့ အခေါ်ခံရတော့တာပါ။ ကွန်မြူနစ် ဘာသာမဲ့လို့ သမုတ်ခံရတဲ့ ဆရာတော်ကြီးတွေထဲမှာ မဟာဂန္ဓာရုံ ဆရာတော် ဘုရားကြီး အရှင်ဇနကာ ဘိဝံသတောင် ပါတယ် ထင်တာပဲ။ ဆရာတော်ကြီးက ဘယ်လိုလုပ် ဘာသာမဲ့မှာလဲ။ ဘယ်လောက် ထိချက် ပြင်းလိုက်သလဲ။ ဒါက ဟိုခေတ်ကပါ။
ခုခေတ်လဲ ဘာထူးမှာလဲ။ ဗုဒ္ဓဘာသာတွေရဲ့ ထောက်ခံမှူကို ရဖို့အတွက် ဗုဒ္ဓဘာသာကို အသုံးချကြတာပဲ မဟုတ်လား။ အမျိုးဘာသာ သာသနာ အားပေးသူကို ထောက်ခံကြဖို့ စည်းရုံးတာဟာ. .. . အသုံးချတာပဲ မဟုတ်လား။ နိုင်ငံရေးနယ်ပယ်က စည်းရုံးရေး စည်းကမ်းတွေ ထားပါတော့။ ငါ့ရှင်လေးတို့ အနေနဲ့လည်း ကိုယ့်ဗုဒ္ဓဘာသာ အားပေးသူကို ထောက်ခံရမှာပေါ့ ဆိုရင်လည်း ဟုတ်ပါတယ်။ ထောက်ခံကြပါ။ နိုင်ငံရေးဘက် စိတ်ဝင်စားတယ်ဆိုရင် ထောက်ခံလည်း ထောက်ခံသင့်ပါတယ်။ ဒါပေမယ့် ကိုယ်ထောက်ခံသူတွေက ကိုယ့်ဗုဒ္ဓဘာသာကို အမှန်တကယ် အားပေးတာ ဟုတ်ရဲ့လား ဆိုတာကိုတော့ မှန်မှန်ကန်ကန် စဥ်းစားသုံးသပ်နိုင်ကြစေချင်ပါတယ်။ 
 
နောက်တစ်ဆင့် သူတို့က ဗုဒ္ဓဘာသာကို တကယ်ပဲ အားပေးကြတယ် ဆိုပါစို့။ ဗုဒ္ဓဘာသာကို အားပေးရုံနဲ့တင် အပြည့်အဝ ထောက်ခံသင့်ပြီ၊ မိုက်မိုက်ကန်းကန်း ပြတ်ပြတ်သားသား ဘက်ယိမ်းသင့်ပြီလို့ ဆုံးဖြတ်လိုက်ကြတော့မှာလား။ ဗုဒ္ဓဘာသာ တစ်ခုတည်းပဲ ဘာသာတရား မဟုတ်ဘူးလေ။ ဗုဒ္ဓဘာသာတစ်ခုတည်း ရှိနေလို့မှ မရတာ။ နောက်ပြီး. .. . ဘာသာရေးအပြင် လူမျိုးရေး၊ လူမှူရေး၊ စီးပွားရေး၊ ပညာရေး၊ ကျန်းမာရေး၊ အရေးများစွာ ရှိသေးတာ မဟုတ်လား။
 
ငါ့ရှင်လေးတို့ အနေနဲ့. .. ... မသိဘူး၊ ဘာမှ လာမပြောနဲ့၊ ဗုဒ္ဓဘာသာမှ ဗုဒ္ဓဘာသာပဲ၊ ဗုဒ္ဓဘာသာ အေးရာအေးကြောင်း ဖြစ်နေရင် ရပြီ၊ ကျန်တာတွေ. ... . ဖြစ်ချင်ရာဖြစ်၊ ကျန်တဲ့ ဘာသာတွေ . . . ကွယ်ချင်ရာကွယ်၊ လူမျိုးရေး. .. . ပြာကျချင် ကျပါစေ၊ ပညာရေး. .. . ဝလုံးတောင် မရေးတတ်ချင် နေပါစေ၊ စီးပွားရေး. .. .. တောင်းစားရ စားရ၊ အဝှာခံစားရ စားရ၊ ကျန်းမာရေး. .. .. အခုချက်ချင်း သေချင်သေ၊ ဘာတွေ ဖြစ်နေဖြစ်နေ ဗုဒ္ဓဘာသာ အိုကေရင် ငါတို့လည်း စိုပြေပြီလို့ ခံယူထားတယ် ဆိုရင်တော့. .. .. .. .. .... ... .. .. ။
ဗုဒ္ဓဘာသာ တစ်ခုတည်း တိုးတက်နေဖို့ မဖြစ်နိုင်ဘူး၊ သာသနာ တစ်ခုတည်း ထွန်းကားနေဖို့ မဖြစ်နိုင်ဘူး ဆိုတာကို သဘောပေါက်ကြစေချင်တာပါ ငါ့ရှင်လေးတို့ရေ။ သာသနာဆိုတာ အညောညနိဿိတာပါ။
 
🙂
ရှင်အာစာရ

(၁၀)ဝါပြည့်တင်း

 July 24, 2021


-----
စစ်ကိုင်းတိုင်း၊ ဒီပဲယင်းမြို့နယ်၊ စိုင်ပြင်မြို့၊ ရာဟုလာဓမ္မသင်တန်းကျောင်းတိုက်အတွင်း ဆယ်ကြိမ်မြောက် ဝါကပ်​ခြင်းကို ဘုရားအမှူးပြုသော ရဟန်းသံဃာ သုံးပါး၊ ရှင်သာမဏေ ဆယ့်နှစ်ပါး နှင့် ကျောင်းသား သုံးယောက်တို့ ဆောင်ရွက်ကြသည်။ ကပ်ဘေးနှင့် အခြားအခက်အခဲများကြောင့် စုပေါင်း ဝါဆိုသင်္ကန်းကပ်ပွဲ ပျက်ပြယ်ပါသည်။
 
ဂျပန်ဗိုလ်မမာတင် ဝါဆိုသင်္ကန်း ဆယ့်ငါးစုံ၊ ရှင်သာမဏေများ နှင့် ကျောင်းသားများအတွက် ငါးထောင်ကျပ်တန် နဝကမ္မ စာအိပ်တစ်လုံးစီ၊ ရဟန်းတော်များအတွက် ငါးသောင်းကျပ်တန် နဝကမ္မ စာအိပ်တစ်လုံးစီ နှင့် သပိတ်တစ်လုံး အသီးသီးသော လှူဒါန်းဖွယ်ရာများကို စိုင်ပြင်မြို့နေ ကျန်းမာရေးမှူး ဦးမြင့်မောင် + ဒေါ်နွယ်နွယ်၊ ရွှေရုပ်လွှာ ပန်းချီပန်းပု မြန်မာမှုနှင့် နိဗ္ဗာန်ကုန်လုပ်ငန်း မိသားစုက ဆက်ကပ်လှူဒါန်းပါသည်။
 
အောက်ပါ ဆွမ်းအလှူရှင်များက ကျောင်းတိုက်၏ ဆယ်နှစ်တာ အတိတ်ခရီးနှင့် အနာဂတ်ခရီး ဆွမ်းကိစ္စများ တာဝန်ယူပါသည်။
 
ဝါတွင်းဝါပ နေ့စဥ် ​နေ့ဆွမ်း နိစ္စဘတ် အလှူရှင်များ -
 
ဦးလှဟန် + ဒေါ်အေးခင် မိသားစု
ဦးကျော်ကျော်ဦး၊ ဒေါ်ကြည်ကြည်ဦး မိသားစု
ဦးမြင့်ဇော် + ဒေါ်ကြည်ကြည်ဝင်း မိသားစု
ဦးလင်း + ဒေါ်ဌေးမြိုင် မိသားစု
ဦးနိုင်ဝင်း + ဒေါ်မြို့ရှင် မိသားစု
ဦးအောင်ခ + ဒေါ်တင်အေး မိသားစု
ဦးဇော်လင်း + ဒေါ်ခင်စန်းဝင်း မိသားစု
ဦးတင်သောင်း + ဒေါ်ခင်ပိုင် မိသားစု
ဦးခင်မောင် + ဒေါ်တင်ရွှေ မိသားစု
ဦးကျော်သန်း + ဒေါ်တင်သန်း မိသားစု
ဦးညိုသင်း + ဒေါ်သန်းအေး မိသားစု
 
ဝါတွင်းဝါပ သီတင်းပတ်စဥ် နေ့ဆွမ်း အလှူရှင်များ -
 
ဦးအောင်ခ + ဒေါ်တင်အေး မိသားစု (တနင်္ဂနွေ)
ဦးစံဝင်း + ဒေါ်ခင်ဌေးဝင်း မိသားစု (တနင်္လါ)
ဦးမောင်မောင် + ဒေါ်ခင်ဇာ မိသားစု (အင်္ဂါ)
ဦးစိန်လင်း + ဒေါ်စိန်အေး မိသားစု (ဗုဒ္ဓဟူး)
ဦးလှဟန် + ဒေါ်အေးခင် မိသားစု (ကြာသပတေး)
ဦးဗိုလ်ရှိန် + ဒေါ်သန်းနွဲ့ မိသားစု (သောကြာ)
ဦးတင်ရွှေ + ဒေါ်တင်လှ မိသားစု (စနေ)
 
ဝါတွင်းဝါပ သီတင်းပတ်စဥ် အရုဏ်ဆွမ်း အလှူရှင်များ -
 
ဦးမောင်မောင် + ဒေါ်ခင်ဇာ မိသားစု (တနင်္ဂနွေ)
ဦးညွန့်သိန်း + ဒေါ်ခင်မြတ် မိသားစု (တနင်္လါ)
ဒေါ်ရွှေတင်၊ သမီးဒေါ်ယဥ်ယဥ်ဝင်း မိသားစု (အင်္ဂါ)
ဒေါ်ရွှေတင်၊ သမီးဒေါ်ယဥ်ယဥ်ဝင်း မိသားစု (ဗုဒ္ဓဟူး)
ဦးလှဟန် + ဒေါ်အေးခင် မိသားစု (ကြာသပတေး)
ဦးမြင့် + ဒေါ်ဝင်းဌေး မိသားစု၊ ဦးကျော်ကျော်ဦး + ဒေါ်ကြည်ကြည်ဦး မိသားစု၊ ဦးမြင့်ဇော်ဦး + ဒေါ်ဆွေဆွေဦး မိသားစု၊ ဦးတူးမောင် + ဒေါ်မြင့်မော် မိသားစု၊ ဦးမြင့်လှိုင် + ဒေါ်သင်း မိသားစု (သောကြာ အလှည့်ကျ)
ဦးလှဟန် + ဒေါ်အေးခင် မိသားစု (စနေ)
 
အခြားသော ပျောက်ကြား ဆွမ်းအလှူရှင်များကလည်း ​အရုဏ်ဆွမ်း နေ့ဆွမ်း အလျဥ်းသင့်သလို ဆက်ကပ်ပြီး နီးစပ်ရာ ဒကာဒကာမတို့က လှူအပ်ရာရာ ပစ္စည်းလေးပါ အလှူခံနိုင်ရေးအတွက် MPT ၊ တယ်လီနော နှင့် အူရီဒူး ဖုန်းနံပါတ်များ စာရင်းပေးသွင်း ဆက်ကပ်ထားကြပါသည်။
 
အဆိုပါ ကုသိုလ်ရှင်များ၊ နီးနီးဝေးဝေး ပစ္စည်းလေးပါး အလှူရှင်များနှင့် ပံပိုးအား မှန်သမျှကို ကျေးဇူးသာဓု အကြိမ်ကြိမ်ပြု၍ ဗြဟ္မစိုရ်ဓာတ် ပို့လွှတ်အပ်ပါကြောင်း ရာဟုလာ ဆယ်နှစ်ခရီး အမှတ်တရစကား မြွက်ကြားအပ်ပါသည်။
သာဓု၊ သာဓု၊ သာဓု. .. .. .။