World Peace (Part 3) - ကမ္ဘာ့ငြိမ်းချမ်းရေ (အပိုင်း ၃)

(. . . . . မှ အဆက်) 

ကမ္ဘာ့ငြိမ်းချမ်းရေအတွက် ကမ္ဘာ့သာသာကြီးများ

အခု ဆွေးနွေးခဲ့ပြီးဖြစ်တဲ့ အခြေခံ သဘောတရားတွေဟာ ကမ္ဘာ့သာသာဝါဒ အားလုံးတို့ရဲ့ ကိုယ်ကျင့်ဆိုင်ရာ သွန်သင်ချက်တွေနဲ့ ကိုက်ညီပါတယ်။ ဗုဒ္ဓဘာသာ၊ ခရစ်ယန်ဘာသာ၊ ကွန်ဖြူးရှပ်ဘာသာ၊ ဟိန္ဒူဘာသာ၊ အစ္စလာမ်ဘာသာ၊ ဂျိန်းဘာသာ၊ ဂျူးဘာသာ၊ ဆစ်ခ်ဘာသာ၊ တာအိုဘာသာ၊ ဇိုရိုအက်စ်တားဘာသာဆိုတဲ့ ကမ္ဘာ့ ဘာသာကြီးတွေ အားလုံးမှာ တူညီတဲ့ မေတ္တာစံတွေ ရှိကြပါတယ်။ ဘာသာရေး ကျင့်ထုံးနဲ့ လူသားကောင်းကျိုး သည်ပိုးဖို့ဆိုတဲ့ တူညီတဲ့ ရည်မှန်းချက် ရှိကြပါတယ်။ ဘာသာဝင်တွေကို ကောင်းမြတ်သည်ထက် ကောင်းမြတ်တဲ့ လူသားတွေ ဖြစ်လာအောင် လုပ်ပေးရာမှာ တူညီတဲ့ သက်ရောက်မှုတွေ ရှိကြတယ်ဆိုတဲ့ အချက်ကို စွဲစွဲမြဲမြဲ ယုံကြည်ပါတယ်။

ကိုယ်နှုတ်စိတ်ဆိုတဲ့ ကံသုံးပါး အပြစ်ကင်း စင်ကြယ်အောင် ဘာသာတရား အားလုံးက ကိုယ်ကျင့်သီလတွေကို သင်ကြားပေးပါတယ်။ ဘာသာတရား အားလုံးက မလိမ်ညာဖို့ မခိုးမဝှက်ဖို့ မသတ်ဖြတ်ဖို့ စတာတွေ သင်ကြားပေးပါတယ်။ လူသားတွေရဲ့ ဂုရုကြီးတွေ ချမှတ်ပညတ်ခဲ့တဲ့ ကိုယ်ကျင့်သီလတွေရဲ့ တူညီတဲ့ ရည်ရွယ်ချက်ဟာ အတ္တကင်းစင်ရေး ဖြစ်ပါတယ်။  ဂုရုကြီးတွေဟာ သူတို့ရဲ့ တပည့်သာဝကတွေကို မောဟအရင်းခံတဲ့ မကောင်းမှုလမ်းကနေ သွေဖယ်ပြီး ကောင်းမြတ်တဲ့ လမ်းကြောင်းပေါ် ရောက်စေချင်ကြပါတယ်။

တစ်ကိုယ်ကောင်းဆန်ခြင်းနဲ့ တစ်ခြား ပြဿနာရင်းမြစ်တို့ ကိန်းဝပ်ရာဖြစ်တဲ့ အထိန်းအကွပ် ကင်းတဲ့စိတ်ကို ထိန်းကျောင်းဖို့ လိုတယ်ဆိုတဲ့ အချက်ကို ဘာသာတရား အားလုံးက သဘောတူပါတယ်။ နောက်ပြီးတော့ ငြိမ်းချမ်းတဲ့၊ သီလရှိတဲ့၊ ကိုယ်ကျင့်ကောင်းတဲ့၊ ပညာဉာဏ်နဲ့ ပြည့်စုံတဲ့ ဘာသာရေး အခြေအနေတစ်ခုဆီ ရောက်နိုင်မယ့် အကျင့်လမ်းကို သွန်သင်ပြသပေးကြပါတယ်။ ဒီလိုအဓိပ္ပာယ်နဲ့ ဘာသာတရားအားလုံး တူညီကြတယ်လို့ ယုံကြည်ပါတယ်။ အချိန်ကာလ ကွဲပြားမှု၊ အခြေအနေ မတူညီမှုနဲ့ ယဉ်ကျေးမှု လွှမ်းမိုးတာတွေကြောင့် တရားဒေသနာ အမျိုးမျိုး ကွဲပြားတာ ဖြစ်နိုင်ပါတယ်။ ဘာသာရေးရဲ့ အတွေးအခေါ်ပိုင်းကိုသာ ထည့်သွင်းစဉ်းစားပြီး ပညာရပ်တစ်ခုအနေနဲ့ ငြင်းခုံနေမယ်ဆိုရင် ဘယ်တော့မှ ပြီးမှာ မဟုတ်ပါဘူး။ ချဉ်းကပ်မှုပိုင်းက အသေးအဖွဲ ကွဲလွဲချက်တွေကို ငြင်းခုံနေမယ့်အစား ဘာသာတရား အားလုံးက ကောင်းမြတ်မှုအတွက် သင်ကြားပေးတဲ့ ကိုယ်ကျင့်သီလတွေကို နေ့စဉ်ဘဝမှာ လက်တွေ့အသုံးချလိုက်တာက ပိုပြီးတော့ အကျိုးရှိပါတယ်။

ရောဂါအမျိုးမျိုးအတွက် ကုသချက် အမျိုးမျိုး ရှိသလိုပေါ့။ လူသားတွေ ကိုယ်စိတ်နှစ်ပါး ချမ်းမြေ့ပျော်ရွင်နိုင်ဖို့ ဘာသာတရား အမျိုးမျိုး ရှိနေပါတယ်။ သက်ရှိအားလုံး ဆင်းရဲဒုက္ခကို ရှောင်လွှဲပြီး ချမ်းသာသုခကို ခံစားနိုင်ဖို့ ဘာသာတရား အားလုံးက သူတို့နည်း သူတို့ဟန်နဲ့ အားထုတ်နေကြတာ မဟုတ်လား။ ဘာသာရေး သစ္စာတရားတွေ တင်ပြပုံ တစ်မျိုးမျိုးကို ပိုပြီး သဘောကျရတဲ့ အကြောင်းတရား မြောက်များစွာ ရှိနိုင်ပါတယ်။ ဒါပေမယ့် လူ့နှလုံးသားက ပေါက်ဖွားလာတဲ့ စည်းလုံးညီညွတ်မှုအတွက် လုံလောက်တဲ့ အကြောင်းတရား ရှိပါတယ်။ အဲဒါက ပိုပြီးတော့ ကြီးမြတ်ပါတယ်။ လူသားတွေရဲ့ ဆင်းရဲဒုက္ခကို လျော့ချနိုင်အောင်၊ ယဉ်ကျေးတဲ့ ကမ္ဘာကြီးကို အကျိုးပြုနိုင်အောင် ဘာသာတရား တစ်ခုစီက နည်းလမ်းတစ်ခုစီနဲ့ ဆောင်ရွက်နေပါတယ်။ ဘာသာကူးပြောင်းမှုက အရေးမကြီးပါဘူး။ ဥပမာ တစ်ခြားဘာသာဝင်တွေ ဗုဒ္ဓဘာသာဝင်ဖြစ်လာအောင် လုပ်ဖို့၊ ဗုဒ္ဓဘာသာ အားကောင်းအောင်လုပ်ဖို့ ဘုန်းကြီးတို့ မစဉ်းစားပါဘူး။ လူသားဝါဒီ ဗုဒ္ဓဘာသာဝင် တစ်ရောက်အနေနဲ့ လူ့သားရဲ့ ပျော်ရွှင်မှုအတွက် ဘာလုပ်ပေးနိုင်မလဲ ဆိုတာကိုပဲ စဉ်းစားပါတယ်။

ကမ္ဘာ့ဘာသာကြီးတွေရဲ့ အခြေခံ တူညီချက်တွေကို ညွှန်ပြရင်း ဘာသာတရား တစ်ခုခုအတွက် စည်းရုံးလှုံ့ဆော်ဖို့ တစ်ခြားဘာသာတရားတွေကို ခုတုံးမလုပ်ပါဘူး။ ဘာသာတရား အသစ်တစ်ခုလည်း မရှာဖွေပါဘူး။ လူသားရဲ့ အတွေ့အကြုံတွေ ကြွယ်ဝဖို့၊ ကမ္ဘာ့ယဉ်ကျေးမှု ထွန်းကားတိုးတက်ဖို့အတွက် အမျိုးမျိုးသော ဘာသာတရားတွေ လိုအပ်ပါတယ်။ စွမ်းရည်အမျိုးမျိုး စရိုက်အမျိုးမျိုး ရှိနေတဲ့ လူ့စိတ်အထွေထွေ ပျော်ရွှင်ငြိမ်းချမ်းဖို့ နည်းလမ်း အမျိုးမျိုး လိုအပ်ပါတယ်။ အစားအစာလိုပေါ့။ တစ်ချို့က ခရစ်ယန်ကို ပိုပြီး သဘောကျတယ်။ တစ်ချို့က ဗုဒ္ဓဘာသာကို ပိုကြိုက်တယ်။ ဗုဒ္ဓဘာသာမှာ ဖန်ဆင်းရှင်ရယ်လို့ မရှိဘဲ အရာရာဟာ ကိုယ့်ကံ၊ ကိုယ့်အပြုအမူပေါ်မှာပဲ မှီတည်နေတဲ့အတွက်ကြောင့် ကြိုက်ကြတာပါ။ တစ်ခြားဘာသာတွေနဲ့ ပတ်သက်လို့လည်း အလားတူ အငြင်းပွားစရာတွေ ရှိပါတယ်။ ဒါကြောင့် ဘဝပုံစံ အမျိုးမျိုးနဲ့ ဆီလျော်ဖို့၊ ဘာသာရေး လိုအပ်ချက် အမျိုးမျိုးအတွက် အဆင်ပြေဖို့၊ တစ်ဦးစီ တစ်ယောက်စီရဲ့ အစဉ်အလာ အမျိုးသားအမွေအနှစ်နဲ့ သင့်တော်ဖို့ လူသားတွေအတွက် ကမ္ဘာ့ဘာသာတရား အားလုံး လိုအပ်တယ်ဆိုတာ ရှင်းပါတယ်။


(ဆက်ရန် . . . . .)

:)

ရှင်အာစာရ

Dalai Lama၏ “A Human Approach to World Peace”ကို ျမန္မာဘာသာျပန္ဆိုပါသည္။

Ref: (20 May 2011):

http://www.dalailama.com/messages/world-peace/a-human-approach-to-peace