June 8
_____
မုဆိုးကျော် တွတ်ပီနှင့် တပည့်ကျော် ဗိုက်ကလေးတို့ အမဲလိုက် မထွက်နိုင်လောက်အောင် ရပ်ရေးရွာရေး ပူလောင်နေကြရခြင်းသည် ရိုးမတောတွင်းရှိ သားကောင်အပေါင်းတို့အတွက် ငြိမ်းချမ်းရေး ဖြစ်နေချေတော့၏။
ပူလောင်လှသည့် တစ်နေ့သ၌ . . . .
"သူကြီး ဘစီက လူသားမို့ သူ့ရာထူး၊ သူ့စည်းစိမ်၊ သူ့အသိုက်အဝန်းအတွက် ယုတ်မာတယ် ပက်စက်တယ် ထားပါတော့ ဗိုက်ကလေးရာ။ ဘစီကို ငါတို့ တော်လှန်တာက တော်လှန်တာပဲ။ ဘစီနဲ့ ရန်ငါ ပြတ်တယ်။ ကျေနပ်တယ်။ ဒါပေမယ့် ဒီကောင်ဘစီ တို့ရွာအပေါ်ယုတ်မာရက်စက်တိုင်း ရွာဦးကျောင်း ဆရာတော်ကြီးက ထောက်ခံအားပေးနေတာ . . . ဘာသဘောလဲ။ လုပ်ပေါက်က . . .။ ငါတို့ ကြုံတိုင်းတစ်ရွာလုံး တစ်သက်လုံး လေးစားခဲ့ကြသမျှ . . . သဲထဲရေသွန်ကွာ . . .။ တောကောင်ရတိုင်း (မရှောင်ရင် လွတ်မယ့်) ဦးဦးဖျားဖျား ဆွမ်းပို့မိခဲ့တာတွေ . . . ရင်နာလို့ မဆုံးဘူး။ ဆရာတော်ကြီး ဟောခဲ့တဲ့ တရားတွေ၊ ဆရာတော်ကြီး ဦးဆောင်လုပ်ကိုင်ခဲ့တဲ့ ရပ်ရွာအကျိုးပြု လုပ်ငန်းတွေ . . . အခု ဘာလုပ်လို့ ရတော့မှာလဲ။ မြောင်းထဲ ရောက်ကုန်ပြီ။ ရပ်ရွာဦးခေါင်း သူတော်ကောင်း လုပ်နေပြီး . . . အင်း . . .။ ဟွန်း။ အယုတ်တမာကောင် မအေရိုး ဘစီက ဘာတွေများ ကျွေးထားလဲ မသိဘူး။ ငါ ကွာ . . .။"
"ဆတွတ် စိတ်လျှော့ပါဗျ။ ကျွန်တော်တို့ ကံပေါ့ဗျာ။ အချိန်တန်ရင် အဖြေပေါ်သွားမှာပါ။ ဆရာတော်ကြီးကို နိုင်ထားတဲ့အကွက် သူကြီးဘစီမှာ ရှိထားတယ်တဲ့ ဗျ။ ဆရာတော်ကြီးရဲ့ ခြေစခေါင်းဆုံး စီစီတီဗီမှတ်တမ်း ဇာတ်လမ်းတွေက သူကြီးဘစီဆီမှာတဲ့ ဗျ။"
"ဘာမှတ်တမ်းလဲ။ မင့် ဘယ်သူပြောတာလဲ။"
"နားနဲ့မနာ ဖဝါးနဲ့နာပါဗျာ။ *888*၊ *555*၊ *.*၊ &69၊ *.* ၊ 69& တဲ့ ဆတွတ်ရေ။"
"ဟေ ဟေ့။ ကောင်းကြရောကွာ။"
"ကျွန်တော်လည်း အခန်းနေ ဦးဇင်းလေးဆီက ကြားတာပဲ။ ဦးဇင်းလည်း ကပ္ပိယကြီး ပြောပြလို့ သိတာတဲ့။ ကပ္ပိယကြီး ကျောင်းကထွက်သွားရတာ အဲ့ဒီ စီစီတီဗီ မှတ်တမ်းတွေနဲ့များ ပတ်သက်နေသလား မသိဘူး ဗျ။ ကျွန်တော်တို့ ဂျင်ဇီတွေ ဆက်လိုက်နေပါတယ်။ ခဏပဲ စောင့်ပါ။"
"တွေ့ကြသေးတာပေါ့ကွာ။ အေး။ ဘာပဲဖြစ်ဖြစ် စကားပြောရင် မင့်ကိုယ်မင်း ဂျင်ဇီ ဂျင်ဇီနဲ့ မညွှန်းဖို့ တစ်ရာ့တစ်ကြိမ်မြောက် သတိပေးတယ်။ ဒါနောက်ဆုံးပဲ။ ကိုယ့်အသက်ကိုယ် ပြန်တွက်အုံး။"
"ဟုတ်။"
ဒီနေ့ ဗိုက်ကလေး ကံမကောင်းပါလား။
No comments:
Post a Comment