သားတို့သမီးတို့အားလုံး ဘေးမသီ ရန်မခကြဖို့ ဘုန်းဘုန်းကြီးက နေ့စဉ်မပြတ် ဒလဟော ဒလစပ် အထူးရှယ် ရွှေမေတ္တာဓာတ်တွေ အဆက်မပြတ် အိုက်တင်မျိုးစုံနဲ့ ပို့လွှတ်နေတယ်ဆိုတာ အထူးပြောစရာ လိုမယ် မထင်ပါဘူး။
တိုက်ပွဲဝင်နေကြတဲ့ သားတို့သမီးတို့ အားလုံးကို အထူးပဲ ချီးကျူးဂုဏ်ပြုကြောင်း ရွှေသတင်းစကား ပါးလိုက်ပါတယ်။ သားတို့သမီးတို့ အားလုံးကို အရမ်းကာရော ပစ်စလက်ခတ် ပယ်ပယ်နယ်နယ် ပက်ပက်စက်စက် လေးစားပါမိတယ်။ ဒါကို ဘယ်သူမှတော့ မသိပါစေနဲ့နော်။ ဘာဖြစ်လို့လဲ ဆိုတာကတော့ . . . သားတို့သမီးတို့က ပိုသိပါတယ်။
သားတို့သမီးတို့ သက်စွန့်ဆံဖျား လှုပ်ရှားနေကြတာတွေကို ဘုန်းဘုန်းကြီး အမြဲမပြတ် စောင့်ကြည့်နေပါတယ်။ ကြည့်ရင်းကြည့်ရင်း . . . နေ့စဉ်နေ့တိုင်းပဲ စဉ်းစားသုံးသပ်တာတွေ လုပ်နေပါတယ်။ မလုပ်လို့လည်း မရတော့ဘူးလေ။ မဝေးတော့တဲ့ အနာဂတ်မှာ သားတို့သမီးတို့နဲ့ သင့်တော်မယ့် ဘယ်လို သင်တန်းတွေ စီစဉ်ရမလဲ ဆိုတာကို ကျကျနန ဂဃနဏ ကြံစည်နေပါတယ်။ သားတို့သမီးတို့ အနာဂတ် မလှရင် ဘုန်းဘုန်းကြီးလည်း အနာဂတ်ပျောက်မှာပါ။ ခေတ်ကာလအလျောက် သင်တန်းတွေ ပုံစံပြောင်းပေမယ့် အနှစ်သာရကတော့ အလိမ္မာတွေ သင်ပေးမှာပဲ ဖြစ်ပါတယ်။ သစ္စာတွေ၊ မေတ္တာတွေ အရင်နဲ့ မတူတဲ့ နည်းစနစ်တွေနဲ့ သင်ပေးမှ ဖြစ်တော့မယ်။ အထာမျိုးစုံး သုံးမယ်။ ဆိုက်ကိုတွေ ပါမယ်။ မိုတီတွေ သွင်းမယ်။ ဘာပဲဖြစ်ဖြစ် သားတို့သမီးတို့ အားလုံး တက်တက်ကြွကြွနဲ့ ရယ်မောပျော်ရွှင်ကြရမယ့် သင်တန်းတွေ ဖြစ်မယ်ဆိုတာ ယုံထားလိုက်ပါ။ အဲ့ဒီကျမှ ဘုန်းဘုန်းကြီးကို ပစ်မသွားကြပါနဲ့နော်။ လောလောဆယ် . . . ကွန်ဂရက်ကျူလေးရှင်းပါ။ ဖိုင်းတင်း။
ရွှေမေတ္တာတုံး အကြီးကြီး ယီးတိုက်၍ ပို့သလျက်
သားတို့သမီးတို့ အားလုံး ချစ်ကြတဲ့
ရာဟုလာဆရာတော်ဘုရားကြီး
No comments:
Post a Comment