July 11, 2021
-----
@zoom
"အားလုံး မင်္ဂလာပါ ဘုရား။"
"မင်္ဂလာပါ။ မင်္ဂလာပါ။ မင်္ဂလာပါ။ မင်္ဂလာပါ။. .. .. .. ."
"ကဲ လိုင်းကောင်းတုန်း မြန်မြန်စလိုက်ကြပါစို့။ ဦးစန္ဒြာလင်္ကါရ အရင်ဆုံး ဆွေးနွေးပေးပါ ဘရား။ ကိုဗစ်အပါအဝင် ဒကာဒကာမတွေ လတ်တလော ရင်ဆိုင်နေကြရတဲ့ အခက်အခဲ အကြပ်အတည်း အားလုံးကို အမြန်ဆုံး နဲ့ အကောင်းဆုံး ကျော်လွှားနိုင်ရေး သံဃာတော်တွေဘက်က ဖြစ်နိုင်သမျှ ပံ့ပိုးကြဖို့ လုပ်သင့်တာတွေ၊ လုပ်နိုင်တာတွေ၊ လက်ရှိ လုပ်နေတာတွေ၊ ဘာဆက်လုပ်သင့်တယ် ဆိုတာတွေ ဆွေးနွေးပေးပါ ဘုရား။"
"တပည့်တော် တစ်ဦးတည်းအမြင်အရကတော့ ပြဿနာ အားလုံးရဲ့ အရင်းခံက နိုင်ငံရေး ပြဿနာပဲ။ ရခိုင် သံဃာထု အနေနဲ့ကတော့ ရခိုင်ပြည်သူတွေနဲ့ တစ်သားတည်း ရပ်တည်မှုက နယ်ပယ်တိုင်းမှာ ရှိနေပါတယ်။ ရခိုင်သမိုင်း မရိုင်းဖို့ တာဝန်ရှိကြတယ်လို့ ယုံကြည်ထားကြတာပါ။ ရခိုင့်သမိုင်းမှာဆိုရင် မြောက်ဦးသမိုင်းကို မေ့ထားလို့ မရပါဘူး။ ဒါ့ကြောင့် ရခိုင်နိုင်ငံတော် ပြည်လည်တည်ဆောက်ပြီး ရခိုင်သမိုင်းကို ရခိုင်တွေ ပြန်ရေးဖို့ပဲ။ ဘယ်သူတွေ ဘာပဲ လုပ်နေလုပ်နေ၊ ဘုံရန်သူ ဘာပဲဖြစ်ဖြစ်၊ သွားချင်ရာကို ဦးတည်ကြ။ ရခိုင်တွေအတွက် အရေးကြီးတာက ရခိုင်သမိုင်းနဲ့ ရခိုင်နိုင်ငံတော်ပဲ။ ရခိုင်သံဃာတွေက ဒါပဲ လုပ်မှာပါ။"
"တပည့်တော်တို့ မွန်ရဟန်းတော်တွေ လိုလားတာကလည်း မွန်ပြည်သူတွေနဲ့ တစ်သားတည်းပါ။ ဦးတည်ချက်ကလည်း မွန်ပြည်သစ်ပါပဲ။"
"တပည့်တော်တို့ ရှမ်းသံဃာတွေကတော့ ရှမ်းပြည် ပြန်လည်ထူထောင်ရေး၊ ရှမ်းပြည်တိုးတက်ရေး ကိစ္စတွေမှာ ရှမ်းပြည်သူတွေနဲ့ အတူရှိနေပါတယ်။"
"အင်း. .. .. . အရှင်ဘုရားတို့ အားလုံး သတိထားမိပြီးသား ဖြစ်မှာပါ။ အဓိက အတားအဆီးကို မဖယ်ရှားနိုင်ရင် ဘာမှ ဖြစ်လာမှာ မဟုတ်ဘူး ဆိုတာကိုလည်း ပြန်လည် သုံးသပ်ကြဖို့ အထူး သတိပေးပါရစေ ဘုရား။ ကဲ နောက်တစ်ပါး. .. .. . မြန်မာရဟန်းတော်တွေထဲက. .. ... တောင်ငူဘက်က ဦးဝိဇယာဘိဝံသ အမိန့်ရှိပါ့အုံး ဘုရား။"
"တပည့်တော်တို့ တောင်ငူဘက်က အထူးပြောစရာ မရှိပါဘူး။ ဦးစန္ဒြာလင်္ကါရ ပြောလိုက်မှပဲ ကိုယ့်သမိုင်းကိုယ် ပြန်ငဲ့ကြည့်မိတော့တယ်။ တပည့်တော်တို့ တောင်ငူမှာလည်း နတ်သျှင်နောင်ခေတ် ရှိခဲ့တာပဲ။ တောင်ငူသမိုင်းကို ပြန်လည်တူးဖော်ဖို့ သင့်မသင့်၊ တောင်ငူခေတ်က ထွန်းကားခဲ့တဲ့ ရတုတွေ ပြန်လည်အသက်သွင်းရမလား၊ တောင်ငူဘုရင် တစ်ပါးပါး ပြန်လည်နန်းတက်နိုင်အောင် လုပ်ရမလား။ နောက်ပိုင်းမှာ ဝိုင်ဝန်းဆွေးနွေး ပေးကြစေချင်ပါတယ် ဘုရား။"
"အဲ. .. .. တပည့်တော် နည်းနည်းတော့ သဘောပေါက်မိသလိုပဲ ဘုရား။ တပည့်တော်တို့ ရွှေဘိုမှာလည်း ဥသြအော်မြည် ကုန်းဘောင်တည် ဆိုတဲ့အတိုင်း ရှေးက စည်ကားခဲ့တဲ့ ကုန်းဘောင်ရာဇဝင် ခမ်းနားခဲ့တာပဲ မဟုတ်လား။ အတိတ်သမိုင်းကို ခြေရာခံပြီး အနာဂတ်သစ် တည်ဆောက်မယ်ဆိုရင် ကုန်းဘောင်ကိုယ်ပိုင်အုပ်ချုပ်ခွင့်ရဒေသ သတ်မှတ်နိုင်ဖို့ ကြိုးစားရမယ့် သဘောပါပဲ။ ဒီပဲယင်းလည်း သူ့သမိုင်းနဲ့သူပဲ။ ဒီပဲယင်းတည်စ ဘုံဘေးမ ဆိုတော့ ရွှေဘိုထက်တောင် စောခဲ့သေးတာပါ။ ဒီပဲယင်းစိတ်ဓာတ် ပြင်းထန်လာရင် အခုခေတ်မှာ . . . ဒီပဲယင်း တောင်လက်နဲ့ ဒီပဲယင်း မြောက်လက်. .. .. . ဒီပဲယင်း ပီဒီအက်ဖှ် နှစ်ဖွဲ့ကွဲ့ပြီး အချင်းချင်း ပြန်တိုက်ကြအုံးမလား။ ရှမ်းပြည်မှာ တောင်းပိုင်းမြောက်ပိုင်း လက်နက်ကိုင် နှစ်ဖွဲ့ရဲ့ တိုက်ပွဲတွေက သက်သေ အထင်အရှား ရှိနေတယ် မဟုတ်လား။ ပါတီထောင်ကြမယ် ဆိုရင်လည်း ဒီပဲယင်းနိုင်ငံတော်သစ်ပါတီပေါ့။ ဒါကိုလည်း ဆက်လက်ဆွေးနွေးပေးကြပါ ဘုရား။"
မှတ်ချက် -
ထို့နောက် အင်တာနက်လိုင်း ယာယီပြတ်တောက်သွားပါသဖြင့် ခဏတာ စိတ်သက်သာရာ ရခဲ့ပါသည်။
