"အင်း . . . ရာသီဥတုက အုံ့မှိုင်းမှိုင်းနဲ့ . . . အင်း . . . ဘာတွေများ ဖြစ်အုံးမလဲ မသိပါဘူး ဒကာကြီးရေ . . .။ အင်း . . .။"
"မှန်ပါ့။ တရုတ်ပြည်မှာ သဲမုန်တိုင်း ကျနေပြန်ပြီ တဲ့။ အဲ့ဒါကြောင့် ရာသီဥတု ပျက်တာများလား မသိပါဘူး ဘုရား။ တပည့်တော်တို့ဆီမှာတော့ ရတနာ သုံးပါး ဂုဏ်ကျေးဇူးကြောင့် . . . ဘာအန္တရာယ်မှ မလာနိုင်ပါဘူး။ စစ်ပွဲကတော့ သေချာသလောက်ပဲ ဘုန်းဘုန်းရယ် . . .။ စစ်ဖြစ်ရင်တော့ သေကြကျေကြ . . . ငတ်ကြပြတ်ကြ . . . ဒုက္ခရောက်ကြအုံးမှာပဲ။ မေတ္တာပို့ပေးပါ့အုံး ဘုရား . . . ဟဲ ဟဲ . . .။ အော် . . . ဒါက . . . မနေ့က ဘုန်းဘုန်း မကြွနိုင်လို့ ဘုန်းဘုန်းကို ကပ်ဖို့ တပည့်တော် ယူလာတာ . . .။ ဒီနှစ် ဘုန်းဘုန်း ရတဲ့ စာချဘွဲ့။"
"အင်း . . .။"
"ခေတ်မကောင်းတော့ ဘုန်းဘုန်းတို့လည်း စာဝါတွေ နားထားရတာပေါ့။ အဲ . . . တပည့်တော် အခုလာတာက . . . ဘုန်းဘုန်းဆီ အကူအညီတောင်းဖို့ လာခဲ့တာ ဘုရား . . ."
"အင်း . . .။"
"ဘာမှ စိတ်မပူပါနဲ့ ဘုရား။ အားလုံး အေးအေးချမ်းချမ်းဖြစ်အောင် တပည့်တော်တို့ ကိုင်တွယ်နေပါတယ် . . .။ တာဝန်တွေ များလာရင် တပည့်တော် . . . ဘုန်းဘုန်းတို့ကျောင်း သိပ်လာနိုင်မှာ မဟုတ်တော့ဘူး ဘုရား။ အဲ့ဒါ . . . ဒီရက်ပိုင်းအတွင်း တပည့်တော်လည်း အိမ်မှာ နေနိုင်မှာ မဟုတ်လို့ . . . ဒကာမကြီးနဲ့ ကလေးတွေ စိတ်ချရအောင် ဘုန်းဘုန်းကျောင်း လာပို့ထားမလို့ ဘုရား။"
"အင်း . . .။"
"ဆွမ်းစားကျောင်းနဲ့ . . . ရေချိုးခန်းနဲ့ မဝေးအောင် သိမ်ကျောင်းထဲမှာ နေရာချထားလိုက်မယ် ဘုရား။ ဘုရားကြီးနဲ့လည်း နီးတော့ . . . ဒကာမကြီး ပဋ္ဌာန်းရွတ်ရတာလည်း အဆင်ပြေတာပေါ့ . . .။"
"အင်း . . .။"
"အခုပဲ . . . တပည့်တွေကို ခေါ်ထားတယ် . . .။ သိမ်ကျောင်းရှင်းဖို့ လာကြတော့မှာ။ သိမ်ကျောင်းထဲမှာ ကောဇောအပြည့် ခင်းလိုက်မယ် ဘုရား။ ပတ္တာပြုတ်တဲ့ ပြတင်းပေါက်တစ်ခု တွေ့တယ်။ အဲ့ဒါလည်း အသစ်လဲလိုက်မယ် . . .။ အတွင်းပိုင်း နည်းနည်းလောက် ဆေးပြန်သုတ်လိုက်မယ်။ လောလောဆယ် ဘုရားဘေးက အခန်းထဲမှာ နေနေတဲ့ ဦးဇင်းလေးကို ဆွမ်းစားကျောင်း အပေါ်ထပ် ရွှေ့ခိုင်းလိုက်မယ် ဘုရား။"
"အင်း . . ."
"မျက်နှာကျက် ပန်ကာတွေလည်း မကောင်းတော့ဘူး . . .။ ပန်ကာတွေတော့ ဒီတိုင်းပဲ ထားလိုက်ပါတော့မယ်။ အဲကွန်း စတင်းတွေပဲ ထည့်ခိုင်းလိုက်တော့မယ်။ ဒီအတွက် မီတာခလည်း မပေးရဘူးဆိုတော့ . . . အဆင်ပြေပါတယ် ဘုရား။"
"အင်း . . .။"
"ညနေကျရင် . . . ဘုန်းဘုန်းတို့ ကိုရင်တွေ အတွက်ပါ ရိက္ခာတွေ ပို့လိုက်မယ် ဘုရား။ ဆီ၊ ဆန်၊ ပဲ၊ ငါးခြောက် . . . အခြောက်အခြမ်းတွေ . . . ဆွမ်းစားကျောင်း ဂိုထောင်ထဲ ထားလိုက်မယ်။ ဘာတွေပါသလဲ . . . တပည့်တော်တောင် သေသေချာချာ မကြည့်ရသေးဘူး။ ကလေးတွေ . . . လမ်းဘေး ဝင်မွှေပြီး မလာတာ။ နောက်ထပ်လည်း သယ်ရအုံးမယ် . . . ဘာမှ စိတ်မပူပါနဲ့ ဘုရား။ ကဲ ဘုန်းဘုန်း . . . တပည့်တော် သွားမယ် ဘုရား။ ကလေးတွေ သိမ်ကျောင်းဘက် ရောက်နေလောက်ပြီ။"
"အင်း . . . . . . . . . . . . . . . . .။"
(ဧဝံ မေ သုတံ)
No comments:
Post a Comment