သိမှတ် ပွားများ၊ တိုက်ခိုက်သွား၊ ထိန်းထား မငဲ့ညှာ

(Apr 5, 2017)

(စစ်ကိုင်းတိုင်း၊ ဘုတလင်မြို့နယ်၊ ညောင်ရိပ်သာရွာ၊ ရမ္မာဝတီ မုံပင်ဆရာတော် အရှင်ယသကို နောက်ဆုံးပူဇော်သည့် အန္တိမပူဇာ ဓမ္မသဘင်)

"သိမှတ် ပွားများ၊ တိုက်ခိုက်သွား၊ ထိန်းထား မငဲ့ညှာ"

တရားနာမည်က ရှည်တယ်။ တရားနာမည်ထဲမှာ တရားအနှစ်ချုပ် ပါသွားပြီ ဖြစ်တဲ့အတွက် မှတ်မိအောင် လိုက်ဆိုကြပါ။
"သိမှတ် ပွားများ၊ တိုက်ခိုက်သွား၊ ထိန်းထား မငဲ့ညှာ"

၁။ အသိအမှတ်ပြုပါ၊
၂။ ပွားများပါ၊
၃။ ထိုးစစ်ဆင် တိုက်ခိုက်ပါ၊
၄။ ဆက်လက်ထိန်းသိမ်းထားပါ၊
၅။ မငဲ့ကွက်ပါနဲ့။

ကုမ္ဘူပမံ ကာယမိမံ ဝိဒိတွာ၊
နဂရူပမံ စိတ္တမိဒံ ဌပေတွာ။
ယောဓေထ မာရံ ပညာဝုဓေန၊
ဇိတဉ္စ ရက္ခေ အနိဝေသနော သိယာ။

၁။ ခန္ဓာကိုယ်ဟာ မြေအိုးနဲ့ တူပါတယ်။ ကွဲတတ်ပါတယ်။ ရှတတ်ပါတယ်။ ဒီသဘာဝကို သိထားရပါမယ်။ ကွဲပျက်ရုံတင်မကဘူး။ စူးတတ်ရှတတ်သေးတာ။ ခန္ဓာ့သဘာဝအတိုင်း သေကြပျက်ကြ ကွဲကြပြီဆိုရင် ဆက်စပ်ပတ်သတ်သူတွေ ပူဆွေးကြရတယ်ဆိုတာ အိုးကွဲ စူးရှတာပဲ။

အိုးနှင့်တူစွာ၊ တို့ခန္ဓာ၊ သေချာ သိရမည်။

၂။ ကောင်းတဲ့စိတ်တွေ ပွားအောင်များအောင် လုပ်ထားရမယ်။ ကုသိုလ်နဲ့ ကာကွယ်မထားရင် စိတ်ဟာ မလုံခြုံဘူး။ ကျုံးတွေ မြို့ရိုးတွေနဲ့ လုံလုံခြုံခြုံ ကာကွယ်ထားတဲ့ မြို့တော်လိုဖြစ်အောင် စိတ်ကို ကာကွယ်ရမယ်။ ဘုရားကိုသတိရတယ်။ ဘုရားမှန်း တရားမှန်းသိတယ်။ တစ်ခါတည်း သိတာ မဟုတ်ဘဲ ခဏခဏ အထပ်ထပ် သိနေတာကို ဘာဝနာလို့ခေါ်တယ်။ ပါဠိလိုက ဘာဝနာ။ မြန်မာလို ပွားတယ်လို့ အဓိပ္ပာယ်ရတယ်။ များအောင်လုပ်တာ။ ကူညီဖေးမတာတွေ၊ မေတ္တာထားတာတွေ များအောင်လုပ်ရတယ်။ ကုသိုလ်မျိုးစုံ များအောင် ပွားတော့ စိတ်က လုံခြုံသွားတယ်။ မဟုတ်ရင် အကုသိုလ်။ စိတ်ထဲမှာ မလုံမလဲ။

မြို့နှင့်တူစွာ၊ စိတ်ကိုသာ၊ သေချာ စောင့်ရမည်။

၃။ ကိလေသာ ရန်သူတွေ စိတ်ထဲ ဝင်မလာအောင် ပညာလက်နက်နဲ့ တိုက်ထုတ်ရတယ်။ ပညာဆိုတာ ခွဲခြားပြီး သိတဲ့ အသိကို ပြောတာ။ မှားသလား မှန်သလား၊ ဆိုးသလား ကောင်းသလား၊ သင့်တော်သလား မသင့်တော်ဘူးလား ခွဲခြားသိတာဟာ ပညာပဲ။ ဒီပညာ မရှိရင် စိတ်အညစ်အကြေးတွေကို တိုက်ထုတ်ဖို့ လက်နက်မဲ့သွားပြီ။
 
လက်နက်ပညာ၊ ကိုင်စွဲကာ၊ သေချာ တိုက်ရမည်။

၄။ ရန်သူကိုအောင်ပြီ၊ စိတ်ကောင်းလေး ရပြီ၊ စိတ်ဓာတ် လုံခြုံပြီဆိုရင် ဆက်လက်ထိန်းသိမ်း ထားရမယ်။ အောင်ပြီးသားကို ထိန်းသိမ်းစောင့်ရှောက်ထားရမယ်။ ပစ်ထားလိုက်ရင် ရန်သူ့လက်ထဲ ပြန်ပါသွားမယ်။

နိုင်ပြီးသောခါ၊ လုံဖို့ရာ၊ သေချာ ထိန်းရမည်။

၅။ ခန္ဓာကိုယ်ရဲ့ ကွဲပျက်တတ်တဲ့ သဘာဝကို သိမှတ်တဲ့အခါ၊ စိတ်ကို ထိန်းသိမ်းတဲ့အခါ၊ ကုသိုလ်ပွားတဲ့အခါမှာ ဘာကိုမှ မငဲ့ကွက်ပါနဲ့။ မှန်မှန်ဖြောင့်ဖြောင့်ပဲ ဖြစ်ရမယ်။ သားကျွေးမှု မယားကျွေးမှုကြောင့်၊ မိသားစုကို ငဲ့ကွက်ပြီး လမ်းကောက်သွားရင်၊ အမှားလုပ်မိရင် ကိုယ်ပဲ ခံရမှာ။ တရားနာရတာ ညောင်းတယ်၊ ခါးနာလို့ တရားမထိုင်နိုင်ဘူး။ မြေအိုးလို ကွဲပျက်တတ်တဲ့ ခန္ဓာကို ငဲ့နေတာ။ ငဲ့စရာ အမျိုးမျိုးကြောင့် ကုသိုလ်နဲ့ဝေးတယ်၊ အကုသိုလ်တွေ ပြုမိတယ်။ ကိုယ်ငဲ့ရင် ကိုယ်ခံ။

မငဲ့မညှာ၊ ဖြောင့်စင်းစွာ၊ သေချာ ကျင့်ရမည်။