Note on Sineru - မြင်းမိုရ်မှတ်စု

“သိနေရု၊ နေရု၊ မေရု၊ မဟာမေရု၊ ပဗ္ဗတရာဇာ”ဆိုတဲ့ မြင်းမိုရ်တောင်မင်းကြီးဟာ ဟိမ၀န္တာ တောင်တန်းထဲမှာ ပါဝင်တာတဲ့။

ပုံထဲမှာ ပြထားပုံကတော့ သေးသေးလေးပါပဲ။ မြင်းမိုရ်တောင် အောက်နားလေးမှာ အနောတတ်အိုင် ဆိုပြီးတော့လည်း ပြထားပါသေးတယ်။ အဲဒီ မြင်းမိုရ်တောင်ရဲ့ တောင်ဘက်ကလူတွေကို တောင်ကျွန်းသားတွေလို့ ခေါ်ကြတာများလား။ အခု ပြထားတဲ့ သိနေရုဆိုတာက မြန်မာတွေ ပြောကြတဲ့ မြင်းမိုရ်တောင် ဟုတ်ရဲ့လားတော့ မသိပါဘူး။ အနောတတ်အိုင်နဲ့ နီးတယ်ဆိုတော့ မြန်မာတွေရဲ့ မြင်းမိုရ်နဲ့ တူဖို့ နီးစပ်ပါတယ်။

-----

တစ်ခု ကြားဖူးတာက။

မြင်းမိုရ်တောင်ကို ဗဟိုပြုပြီး လေးဘက်လေးတန်မှာ ကျွန်းကြီးလေးကျွန်း တည်နေတာတဲ့။

     ပုဗ္ဗ၀ိဒေဟ = အရှေ့ကျွန်း တဲ့၊

     အပရဂေါယာန = အနောက်ကျွန်း တဲ့၊

     ဥတ္တရကုရု = မြောက်ကျွန်း တဲ့၊

     ဇမ္ဗုဒီပ = တောင်ကျွန်း တဲ့။

ကျွန်းကြီး လေးကျွန်း၊ ကျွန်းငယ် နှစ်ထောင်တဲ့။ ကျွန်းကြီး တစ်ကျွန်းစီမှာ ကျွန်းရံ ငါးထောင်စီ ရှိလို့တဲ့။ ကျွန်းအရေအတွက်ကတော့ အင်ဒိုနီးရှားနဲ့ နင်လားငါလားပါပဲ။ အင်ဒိုနီးရှားက ကျွန်းတွေကို အရံကျွန်း စာရင်းထဲ ထည့်ရမှာလား မသိပါဘူး။

-----

နောက်ပြီးတော့လည်း ရှိပါသေးတယ်။ ကြီးမြတ်မှုကို တင်စားတာပါ။

     မြင်းမိုရ်တောင်ဦး မကျူးတဲ့။

     မိဘကျေးဇူး မြင်းမိုရ်ဦးတဲ့။

     မြင်းမိုရ်ထက် မြင့်သောနေရာတဲ့။

     ချစ်သမျှကို မြင်းမိုရ်ရွှေတောင်တဲ့။

     လူမရောက် မြင်းမိုရ်တောင်၊ ခွေးမရောက် အိမ်မိုးခေါင်တဲ့။

ဒါနဲ့ စပ်မိလို့ လူတွေ မြင်းမိုရ်တောင်ပေါ် ရောက်တာတော့ မမြင်ဖူးသေးပါဘူး။ ခွေး အိမ်ခေါင်မိုးပေါ် ရောက်သွားတာတော့ တွေ့ဖူးပါတယ်။ ငယ်ငယ်တုန်းကပါ။ မျက်နှာချင်းဆိုင်အိမ်ရဲ့ ခေါင်မိုးပေါ် ခွေးတက်တာ။ ခွေးနက်မ။ အိမ်ဘေးက ကောက်ရိုးပုံပေါ်ကနေ တက်သွားတာ ဖြစ်မယ်လို့ ခန့်မှန်းကြပါတယ်။ အိမ်နဲ့ ကောက်ရိုးပုံ လုံခြုံရေးအတွက် စီစီတီဗီ တပ်ဆင်မထားတော့ အတိအကျတော့ မသိရဘူးပေါ့။ ဗမာအတွေး ရှမ်းအပြေး ဆိုတာလို တွေးကြည့်ကြတာပေါ့။ အဲဒီတုန်းက ဆောင်းရာသီ။ မနက်စောစော အေးလို့ချမ်းလို့ နေရောင်အရင်လာမယ့် အိမ်ခေါင်မိုးပေါ် တက်ဝပ်နေတာ။ ခွေးပါးမလို့လည်း တစ်ယောက်က ကောက်ချက်ချပါသေးတယ်။ ဘယ်လိုပဲတက်တက်၊ ဘာကြောင့်ပဲတက်တက် အိမ်ခေါင်မိုးပေါ် ခွေးတက်တာ နိမိတ်မကောင်းဘူး ခိုက်တတ်တယ်လို့ အားလုံးက လက်ခံခဲ့ကြပါတယ်။ မျက်နှာချင်းဆိုင်အိမ်ဆိုတော့ အိမ်ရှင်တွေ ဘေးသင့်ရင် ကိုယ်ဆီလည်း ဘေးဘယာ အစအနတွေ လွင့်လာမှာလား ပူမိတာပေါ့။ ကလေးကိုး။ အိမ်ရှင်တွေ ထိမှာစိုးလို့ ရွာဦးကျောင်း ဆရာတော် အိမ်ကြွပြီး ယံ ဒုန္နံမိတ္တံ လုပ်ပေးရပါသေးတယ်။ ဘယ်သူမှ ဘာဘေးမှ မသင့်ခဲ့ပါဘူး။ ရွာဦးကျောင်းဆရာတော်ရဲ့ ပရိတ် နာမည်ကြီးသွားတာပေါ့။ အိမ်ရှင်တွေသာ ဘေးမသင့်တာ ခွေးနက်မတော့ သေကိန်းဆိုက်သွားပါတယ်။ လှံနဲ့ထိုးသတ်လိုက်ကြလို့ပါ။ သူကလည်း သူပဲလေ။ အိမ်ခေါင်မိုးပေါ်ထိ တက်ပြီးတော့ ကမြင်းကြော ထတာကိုး။

-----

အင်္ဂုတ္တိုရ်ပါဠိတော်ထဲက သတ္တသူရိယသုတ်မှာတော့ နေခုနစ်စင်း ထွက်တဲ့အခါကျရင် မြင်းမိုရ်တောင်တောင်မှ မီးဟုန်းဟုန်း တောက်ရလိမ့်မယ်တဲ့။

ကြုံတုံး ဖတ်ကြည့်ချင်ရင် “သုတ်တော်အကျဉ်း” -

လောကမှာ နှစ်တွေ ရာချီထောင်ချီပြီး မိုးခေါင်တဲ့အခါမျိုး ရှိတတ်ပါတယ်။ အဲဒီလို အခါမျိုးမှာ အပင်ဟူသမျှ ခြောက်သွေ့သွားကြရပါတယ်။ နေနှစ်စင်း ထွက်တဲ့အခါမျိုးလည်း ရှိပါတယ်။ အဲဒီလို အခါမျိုးမှာ မြစ်ငယ် အိုင်ငယ်တွေ ခြောက်သွေ့သွားရပါတယ်။ နေသုံးစင်း ထွက်တဲ့အခါမျိုးလည်း ရှိပါတယ်။ အဲဒီလို အခါမျိုးမှာ ဂင်္ဂါ၊ ယမုနာ၊ အစိရ၀တီ၊ သရဘူ၊ မဟီဆိုတဲ့ မြစ်ကြီးငါးစင်း ခန်းခြောက်သွားရပါတယ်။ နေလေးစင်း ထွက်တဲ့အခါလည်း ရှိပါတယ်။ အဲဒီလို အခါမျိုးမှာ မြစ်ကြီးငါးစင်းတို့ရဲ့ မြစ်ဖျားခံရာ အင်းအိုင်ကြီးတွေ ခန်းခြောက်ကြပါတယ်။ နေငါးစင်း ထွက်တဲ့အခါမျိုးလည်း ရှိပါတယ်။ အဲဒီလို အခါမျိုးမှာ သမုဒ္ဒရာရေဟာ ခြေကျင်းဝတ်လောက် ကျန်တဲ့အထိ ခန်းခြောက်သွားရပါတယ်။ နေခြောက်စင်း ထွက်တဲ့အခါမျိုးလည်း ရှိပါတယ်။ အဲဒီအခါမှာ ကမ္ဘာမြေနဲ့ မြင့်မိုရ်တောင်တို့ဟာ မီးဟုန်းဟုန်း တောက်ရပါတော့တယ်။ ဒီမီးဟာ ဗြဟ္မာပြည်တိုင်အောင် တတ်ရောက် လောင်ကျွမ်းပါတယ်။ အဲဒီအခါမှာ ကမ္ဘာမြေနဲ့ မြင့်မိုရ်တောင်တို့ဟာ ထောပတ်တို့ ဆီးတို့လောင်ကျွမ်းသလိုမျိုး လောင်ကျွမ်းသွားတာမို့ ပြာတို့် မီးသွေးတို့တောင် မကျန်ရစ်တော့ပါဘူး။ ငြီးငွေ့စရာပါ။ တက်မက်စွဲငြိစရာ မဟုတ်ပါဘူး။ လွတ်မြောက်ရုန်းထွက်ရမယ့် အရာသာ ဖြစ်ပါတယ်။ လောကရဲ့ နိဂုံးဟာ သုညဖြစ်တယ်ဆိုတာကို အရိယာပုဂ္ဂိုလ်တို့သာ လက်ခံယုံကြည်နိုင်ကြပါတယ်။

သုတ်တော်မှာ ဆိုလိုတာက လောကနိဂုံး = သုည။

ကာလပေါ်တေးထဲမှာတော့ နေဆယ်စင်းတဲ့။ ခုနစ်စင်းထက် ပို ပူမှာပေါ့။

-----

မန္တလေး န.ပ.သ မှာတုန်းက ဆရာကြီး ဦးဌေးအောင် ရှင်းပြဖူးတာ မှတ်မိပါသေးတယ်။

“သုံးကျွန်းလင်းခိုက် တစ်ကျွန်းမိုက်”။

မြင်းမိုရ်တောင်ဆိုတာ ဤကမ္ဘာကြီးကို ပြောတာတဲ့။

ကမ္ဘာ့ဟိုဘက်ခြမ်းမှာ နေမင်းကြီး ရှိနေတော့ နေ၀င်တာပေါ့တဲ့။

နေက ကမ္ဘာကြီးနဲ့ ကွယ်သွားတာကို မြင်းမိုရ်တောင်နဲ့ ကွယ်တယ်လို့ ရှေးလူကြီးတွေ ထင်ကြတာတဲ့။

နေက ကမ္ဘာကို ပတ်တာမဟုတ်ဘူး။ ကမ္ဘာက နေကို ပတ်တာတဲ့။

ဆရာကြီး ပြောသလိုဆိုရင် ဤမြင်းမိုရ်ကြီးက နေမင်းကြီးကို လှည့်ပတ်နေတာပေါ့။

-----

ဘာကပဲ မြင်းမိုရ်ဖြစ်ဖြစ်၊ မြင်းမိုရ်ကြီး ဘာပဲဖြစ်နေဖြစ်နေ မြန်မာတွေ (အနည်းဆုံး အများစု)ရဲ့ ရင်ထဲမှာတော့ မြင်းမိုရ်ဆိုတာ ကြီးကျယ်မြင့်မြတ်မှုရဲ့ သင်္ကေတ ဖြစ်နေမယ် ထင်ပါတယ်။ ကမ္ဘာတည်သ၍ ပေါ့။

:)

ရှင်အာစာရ

-----

ပုံ -

Page 14, e-Book

http://www.ancient-buddhist-texts.net/Maps/Maps-of-Ancient-Buddhist-India.pdf